Det meiner prosjektgruppa Krafttak Nordvest. Men det er fleire skjer i sjøen knytt til sameksistens, med mellom anna natur og fiskerinæringa.
Krafttak Nordvest har det siste halve året kartlagt og avdekka mulegheitsrommet for etablering av storskala havenergi utanfor Mørekysten.
Konkurransekraft i fare
Det Skaparkraft-finansierte prosjektet består av ei breitt samansett prosjektgruppe med Doxacom, SINTEF, Havkraft, Glocal Green, iKuben, Ocean Network og Salt Lofoten.
– Utan eit krafttak for å auke produksjon av ny fornybar energi i vår region, står konkurransekrafta for våre leiande industrinæringar i fare for å bli svekka. Dette kan igjen føre til tap av verdiskaping og arbeidsplassar langs kysten.
Det seier Kristian Vik som har vore prosjektleiar i Krafttak Nordvest på vegne av Doxacom. Nyleg lanserte dei prosjektrapporten som oppsummerer funna frå arbeidet.
![Kristian Vik i Doxacom. Foto](https://doxacom.no/wp-content/uploads/2023/07/Kristian-Vik-Foto-Doxacom.jpg)
![](https://doxacom.no/wp-content/uploads/2023/07/Erlend-Grytli-Tveten-SINTEF_Foto-Doxacom.jpg)
Les rapporten i sin heilskap her:
![Prosjektgruppa i Krafttak Nordvest. Foto](https://doxacom.no/wp-content/uploads/2023/07/Prosjektgruppa-i-Krafttak-Nordvest.jpg)
Frå venstre: Erlend Grytli Tveten (forskar SINTEF), Kristian Vik (rådgiver Doxacom og prosjektleiar Krafttak Nordvest), Geir Arne Solheim (daglig leiar Havkraft) og Johanne Kjerstad (rådgiver Doxacom). Ikkje til stades: Tale Skorve (seniorrådgiver Salt Lofoten), Maria Krabbe Ranvik (forretningsutvikler iKuben) og Nils Erik Pettersen (daglig leder ON Ocean Network). Foto: Doxacom
Stort potensiale
Her framgår det at prosjektgruppa har avdekka eit stort teknisk potensiale for utvikling av havenergi utanfor Mørekysten, primært i form av flytande havvind og bølgekraft. Regionen har i tillegg ein sterk leverandørindustri knytt til offshorenæringa som kan ta viktige posisjonar i ei ny verdikjede for havenergi.
– Regionen har gode føresetnader for å møte behova som må dekkast ved utbygging og drift av havenergianlegg utanfor kysten vår. Men tilgang til areal med kai- og hamnefasilitetar, og kvalifisert arbeidskraft, vert rekna som dei største utfordringane som vi bør ta tak i for å vere best muleg posisjonerte, seier Nils Erik Pettersen som har representert ON Ocean Network i prosjektet.
Omsyn til miljøeffektar
Det blir òg peika på ein betydeleg kompleksitet knytt til natur og miljø. I den vidare utviklinga tilrår prosjektgruppa derfor at det blir tatt omfattande omsyn til miljøeffektar og naturmangfald, samt kryssande og til dels motsettande interesser frå andre maritime og marine næringar.
– Det vil vere avgjerande at grundige omsyn til natur, miljø, livet i havet og fiskerinæringa blir tatt frå starten av. Det må settast av tilstrekkelege ressursar til å vurdere biologiske konsekvensar av ny kraftproduserande aktivitet i våre havområde, og fiskerinæringa må tidleg involverast i arbeidet med utgreiing av mulege lokalitetar, skriv dei i rapporten.
![Nils Erik Pettersen. Foto](https://doxacom.no/wp-content/uploads/2023/07/Nils-Erik-Pettersen_Foto-Ocean-Network.jpg)
– Regionen har gode føresetnader for å møte behova som må dekkjast ved utbygging og drift av havenergianlegg utanfor kysten vår seier Nils Erik Pettersen, Daglig leder i ON Ocean Network. Foto: ON Ocean Network.
Felles front
Vidare tilrår prosjektet at det blir oppretta dialog med energiaktørar med finansiell gjennomføringsevne til å setje i gang storskala prosjekt som kan utnytte det enorme potensialet i havenergi langs Mørekysten.
Erlend Grytli Tveten, forskar og prosjektdeltakar frå SINTEF, oppsummerer funna som følger:
– Det er viktig å stå samla i heile fylket i ein felles front. Store energiforbrukarar, produsentar, klynger og næringsorganisasjonar må samlast om eit felles krav om auka kraftproduksjon i regionen for å oppretthalde posisjonen vår som eit senter for eksportretta industri.
Les rapporten i sin heilskap her:
Kontaktinformasjon
Kristian Vik, prosjektleiar Krafttak Nordvest på vegne av Doxacom AS, telefon 951 83 350.
Erlend Grytli Tveten, Forskar SINTEF, telefon 454 69 658.
Prosjektpartnarane
![Logoer. Illustrasjon](https://doxacom.no/wp-content/uploads/2023/07/Logo-Skaparkraft.png)
Om Krafttak Nordvest
Krafttak Nordvest har sidan januar 2023 arbeidd med å kartleggje korleis ein kan oppnå berekraftig og forsvarleg næringsutvikling knytt til havbasert fornybar energi på Nordvestlandet.
Krafttak Nordvest er finansiert i samspel mellom Møre og Romsdal Fylkeskommune si ordning «Skaparkraft» og prosjektpartnarane.
«Skaparkraft» er Møre og Romsdal Fylkeskommune sitt omstillingsprogram for styrking av næringslivet i regionen. Målet med programmet er å få fart på det grønne skiftet og auke berekraftig eksport frå fylket.
Om prosjektpartnarane
Doxacom AS: Rådgjevingsfirma med hovudkontor i Ålesund som spesialiserer seg på forretningsutvikling og posisjonering av havbasert næring. I prosjektet: Prosjektleiar og ansvar for kartlegging av sameksistensspørsmål fiskeri/energi.
SINTEF Ålesund: Ein del av stiftinga SINTEF lokalisert i Ålesund. Tilbyr forskings- og utviklingstenester som skaper verdi for industri, næringsliv og offentleg forvaltning på Nordvestlandet. I prosjektet: FoU-partnar og ansvarleg for kvalitetssikring av energiberekningar.
Salt Lofoten AS: Kompetansebedrift basert i Lofoten som mellom anna jobbar med marin forvaltning og kartlegging av arealbruk til havs, både nasjonalt og regionalt. I prosjektet: Leverandør av fiskeridata og analyse av potensielle arealkonfliktar.
Havkraft AS: Teknologileverandør basert i Deknepollen i Måløy, som utviklar og leverer kraftverk som nyttar bølgeenergien til å produsere elektrisk kraft på ein naturvenleg og berekraftig måte. I prosjektet: Ansvarleg for å kartlegge energipotensiale for bølgekraft i prosjektområdet.
NCE iKuben: Tverrfagleg industriklynge og nasjonalt kompetansesenter lokalisert i Molde. NCE iKuben arbeider for å styrke klyngebedriftene si konkurransekraft og innovasjonsevne i globale marknader ved å fokusere på digitalisering, berekraft og forretningsmodellar. I prosjektet: Ansvarleg for å etablere arbeidsforum for havvind i prosjektområdet.
ON Ocean Network SA: Nettverk for leverandørar til industriar relatert til olje, gass og havrom i Kristiansundsregionen. I prosjektet: Ansvarleg for å kartlegge tilgang, manglar og utviklingsstrategiar knytt til service- og logistikkfunksjonar for havenergi.
Glocal Green AS: Bedrift som skal produsere bio-e-metanol ved å etablere økonomisk berekraftige varestraumar for restråstoff og vidareforedling av desse til grønt drivstoff. Selskapet held til i Ålesund. I prosjektet: Ansvarleg for eit case-studie på å kartlegge alternative logistikk- og verdikjeder for grønn metanol som «flytande» energiberar, som alternativ til levering av energi gjennom elektriske kraftkablar.